TOE ILOILO MA TATALA LE TULAFONO SOLIFA’AVAE ‘UA TA’UA O LE TULAFONO O LE FA’AMAUINA O PULE O FANUA 2008 (LTRA 2008)

I le tausaga e 2008, na pāsia ai e le Malo Samoa le Tulafono ‘ua fa’aigoaina o le Fa’amauina o Pule o Fanua 2008 (LTRA 2008) e aunoa ma se fa’atalanoaga lautele po’o le faia fo’i o se palota lautele (referendum) e fa’amanino ai i tagata ‘uma o Samoa le mea lea ‘ole’ā faia e le Malo, ma sa’ili mai ai le lagolagoina o le tulafono fou. ‘Olo’o fa’ata’atia manino i le Fa’avae o le Malo Samoa le faia o lea mea tāua i lalo o le Vaega 102 & 109.
‘O lona uiga, ‘o le Tulafono lea o le Fa’amauina o Pule o Fanua 2008, ‘ua na lepetia ma solia āiā tatau a tagata o Samoa ma o latou Āiā i Fanua Tau Samoa, e pei ona puipuia i lalo o le Fa’avae.
‘Ua pasia le tulafono lenei o le LTRA 2008 ona talu ai le una’i malosi ma ni maliliega fa’akonekarate na faia i le va o le Malo Samoa ma Kamupanī Tupe o le Kelope fa’atasi ma Kamupanī Fa’aunegatupa o le Lalolagi ‘ua manana’o e fa’aaogā ai fanua tau Samoa mo le fausaga o pisinisi ma isi atina’e fa’aonaponei.
Na saunoa le Palemia o Samoa i le televise i se fa’atalanoaga i le tausaga e 2009 e fa’apea ‘o le LTRA 2008, ua na’o ‘ele’ele Pulea Sa’oloto e a’afia ai. Ma le isi, na fa’aulufaleina mai ai ma le itu’aiga pulega o fanua ‘ua fa’aigoaina o le Torrens System i Samoa. ‘O lea pulega e tutusa lelei ma pulega ma Tulafono ‘olo’o fa’aaogaina i ‘Ausetalia ma Niu Sila, lea ‘ua ‘ave’esea mai ai āiā a tagata Aporiti o ‘Austelaia ma tagata Maori o Niu Sila mai o latou ‘ele’ele fa’aleaganu’u. I lalo o lenei itu’āiga pulega, e resitaraina loa se ‘ele’ele, ona se’e’ese loa lea o le pule fa’atausimea fa’ale’āiga (‘olo’o puipuia e le Fa’avae) ‘ae tu’uina atu ‘i le Mālō e pule ai (pulea e le Mālō).
‘I le taimi nei, ‘olo’o una’i e le ali’i Palemia o Samoa le resitaraina o ‘ele’ele Fa’aleaganu’u i lona taumafai lea e resitara i lalo o suafa o Sa’o o ‘Aiga Samoa ‘ele’ele nei fa’aleaganu’u. ‘Ia silafia lelei ‘o ‘ele’ele fa’aleaganu’u e pulea e suli o ‘aiga Samoa, i lalo o le pule fa’atausimea a le Sa’o mo augatupulaga o ‘aiga ta’itasi. E lē mafai ona pulea/’umia e se tagata e to’atasi e pei o le Sa’o ‘ele’ele fa’aleaganu’u.
Talu ai le pāsia o le tulafono lea o le LTRA 2008, ‘ua mafai ai nei ona pule’esea ‘ele’ele fa’aleaganu’u e le Malo i lalo o se lisi po’o se maliliega e saini fa’akonekarate. ‘Ua matuā fete’ena’i lenei mea ma le saunoaga a le Palemia lea na faia i le 2009. (Link : https://www.youtube.com/watch?v=dGU41_byR6k )
‘Ua matuā lamatia nei ma e i’u ina mamulu atu ‘ele’ele fa’aleaganu’u o tagata Samoa talu ai le tulafono lea o le LTRA 2008. E le toe puipuia ma pulea ‘‘Ato’atoa’’ i lalo o le Fa’avae o Samoa, i le taimi lava e resitaraina ai i lalo o le suafa o se Sa’o o se ‘aiga.
‘O tatou tagata Samoa ‘olo’o nonofo i fafo mai o Samoa i atunu’u pei o Niu Sila, ‘Ausetalia, ‘Amerika ma isi atunu’u o le lalolagi, e tumau pea lo tatou pi’itaga i lo tatou fa’asinomaga i Samoa ona o o tatou ‘ele’ele fa’aleaganu’u, suafa matai, tu ma a tatou aganu’u Samoa. ‘O le fa’atinoina o le tulafono lea o le LTRA 2008, ‘ole’ā talepe ai loa ma fa’aleaogāina mea ‘uma nei e pele ma tāua ia i tatou tagata Samoa.