Секој има право на достоинствена работа, вработените не се робови!

Во член 5 од Законот за работните односи е дефинирано дека „работниот однос е договорен однос меѓу работникот и работодавецот во кој работникот доброволно се вклучува во организираниот процес на работа кај работодавецот….“. Од ова следува дека доброволноста е основен принцип на работните односи и дека секаков друг однос би претставувал повреда на законот. Законот за работните односи не вклучува дополнителни одредби кои забрануваат експлоатација на трудот. Механизми за контрола трговците со луѓе кај возрасните користат механизми како неисплаќање на платите, прекумерни часови на работа, немање пристап до медицинска заштита, до личните документи.
Да ја препознаеме трудовата експлоатација и да ја пријавиме секоја злоупотреба!
И апел до работодавачите да се корегираат - да ги препознаат сопствените права и обвсрки, а вработените да не ги третираат како робови!

Трудовата експлоатација подразбира присвојување и експлоатација на туѓ труд од страна на сопствениците на средствата за производство, а жртви можат да бидат луѓе од сите возрасти и социјални групи. Некои од најчестите форми на трудова експлоатација се: повреда на работничките права, трговија со луѓе со цел трудова експлоатација и детски труд.
Иако најчесто жртви на трудова експлоатација се работоспособни мажи експлоaтирани во градежната индустрија, во сезонски земјоделски работи за берење овошје или во фабрики, има и случаи на жени кои доживеале трудова експлоатација како домашна помош, нега и чување на деца, во текстилната индустрија... Станува збор за работни места на кои претежно се работи нелегално, без договор и работна дозвола, за парични надоместоци далеку под договорените, без да се почитуваат договореното работно време и другите услови за работа, а може да има и понижување и казнување на работниците.
************************
Новинари за човекови права во рамки на проектот „Подигање на глас за невидливата работна сила“ кој е дел од проектот „Спречување и борба против трговија со луѓе во Северна Македонија“, кој е во рамките на иницијативата за соработка на ЕУ и Советот на Европа за Западен Балкан и Турција, сака да ги потсети државните органи и сите релевантни чинители да не ги занемаруваат проблемите со лошите услови за работа и кршењето на правата на работниците во земјата и во странство, бидејќи ваквите ситуации може да ја поттикнат трговијата со луѓе заради трудова експлоатација.